Intersección Festival de Arte Audiovisual Contemporáneo

/
Dirección Gonzalo E. Veloso

Un ano máis, a Fundacion Luis Seoane acollerá unha nova edición de Intersección, Festival de Arte Audiovisual Contemporáneo, un espazo que pretende mostrar a diversidade formal e conceptual no panorama das prácticas artísticas e audiovisuais. Dirixido por Gonzalo E. Veloso, o festival consolidouse como punto de encontro para a comunidade artística e a cidadanía, ofrecendo múltiples formatos de exhibición, así como actividades didácticas, de formación específica e diálogo aberto con profesionais e o público en xeral. Salomé Lamas, Dora García, J.P. Sniadecki, Kevin Jerome Everson, Ignacio Pardo, Carme Nogueira ou Verónica Vicente son algúns dos nomes que formaron parte da programación das dúas edicións anteriores. Nesta ocasión, o festival vén marcado pola alerta sanitaria e polas novas formas de acceso aos contidos culturais, dous aspectos que se reflicten no cartel deseñado por Andrea Rodríguez.

A programación desta terceira edición contará con retrospectivas e focos, ademais de varias seccións específicas dedicadas á arte audiovisual galega, proxectos de vídeoinstalación e videoperformance. Un destes focos estará dedicado á traxectoria de Belén Montero e Juan Lesta, dous artistas multimedia que, desde 1998 e baixo o nome de DKS, traballaron ao redor as fronteiras do audiovisual, o artístico e o industrial. Ademais, dentro das datas do festival, celebrarase LAB, unha mesa de traballo coordinada por Enrique Lista para a que se escollerán tres proxectos en fase de desenvolvemento. A recepción de dosieres estará aberta ata o venres 11 de setembro.

A información completa da programación do festival está dispoñible a través do enlace seguinte: interseccion.art

Actividades actuais

Información COVID-19
/
Actividade
Somos o que lemos
Ciclo de literatura contemporánea
/
Actividade