Ao longo do 2022 a Fundación Luis Seoane acolleu o Grupo de Estudos Galiza e o Decolonialismo, un programa que tiña como obxectivo abrir un espazo de investigación experimental. Nesta nova edición, os obxectos de estudo serán a transición ecosocial e o desexo. Ademais, súmase a Fundación Entretantos como coorganizadora.
Agora, o reto do Grupo de Estudos é desentrañar aqueles desexos que activan as pancas que nos permiten avanzar cara a mundos máis habitables formulando unha serie de preguntas. Que experiencias ecosociais son relevantes e poden ser replicadas? Que outros xeitos de subxectivación política se están creando para non poñer en xogo o futuro? Cales poden ser as pancas para saltar do desexo individual á mobilización colectiva ou se os desexos colectivos xeran axencia cidadá? En definitiva, preténdese xerar colectivamente novos relatos que vaian alén do desastre.
Dirixido polo investigador e curador Fran Quiroga e por Nuria Alonso, ambientóloga da Fundación Entretantos, o grupo contará coas intervencións das poetas Luz Pichel, Lara Dopazo e Alba Cid, o experto en agroecoloxia e investigador do CSIC Daniel López, ou a profesora da Universidade de León Belén Sola.
Xoves 14 de decembro. Begoña de Bernardo e Daniel López. Comidas soberanas
A soberanía alimentaria, o papel das persoas consumidoras e as estratexias colectivas para mellorar as desigualdades da cadea alimentaria son os eixos da conversa que a enxeñeira agrónoma e divulgadora Begoña de Bernardo e o doutor en Agroecoloxía e investigador do CSIC Daniel López manterán na segunda sesión do Grupo de Estudos Transición Ecosocial e Desexo. O obxectivo é analizar o significado de proximidade e autonomía, así como as chaves para artellar o local e o global, partindo do contexto actual.
Begoña de Bernardo é enxeñeira agrónoma, activista e divulgadora sobre Transición Enerxética e Límites do Crecemento. Promotora do Centro para a Resiliencia Pousadoira para a divulgación e formación en temas referidos ao cénit do petróleo, ao decrecemento, e á recuperación de saberes tradicionais. Membro da Asociación Véspera de Nada e Rede de Decrecemento Eo Navia-Galiza- O Bierzo e a Rede Galega de Sementes.
Daniel Lopez é Doutor en Agroecoloxía, Socioloxía e Desenvolvemento Rural Sostible. Traballa como investigador no Instituto de Economía, Geografía y Demografía do CSIC e colabora coa Fundación Entretantos. O seu campo de investigación abrangue as metodoloxías participativas para a transición agroecolóxica e os sistemas alimentarios de Base.
Próxima sesión:
Xoves 25 de xaneiro
Jaime Vindel. Estética fósil
