O Día das Letras Galegas de 2012 estivo dedicado á figura do avogado, economista e escritor Valentín Paz-Andrade, quen participou activamente no desenvolvemento político, empresarial e cultural da Galicia do século XX. Ese mesmo ano, a Fundación Luis Seoane abría a súa programación expositiva cunha mostra centrada na vida e na obra de quen compartiu inquedanzas e experiencias con Luis Seoane, con Castelao ou con Isaac Díaz Pardo, entre outros. A presente publicación, ademais de servir como memoria da exposición, amplía e afonda en diferentes aspectos da vida persoal e profesional de Paz-Andrade, grazas aos textos do comisario do proxecto, Xosé Díaz, e de figuras como Xosé Manuel Beiras ou Víctor Freixanes, entre outros.