O 9 de maio de 2003, a nova sede da Fundación Luis Seoane abría as súas portas por vez primeira cunha gran exposición da obra de Luis Seoane, que ocupaba a totalidade das salas da primeira planta do edificio, e que sacaba á luz unha ampla selección dos fondos da colección institucional. Xunto a ela, inaugurábase a mostra Seoane e a vangarda. Os seus mestres, os seus amigos, un ambicioso proxecto comisariado pola historiadora da arte e especialista en arte galega contemporánea María Luisa Sobrino Manzanares, concibido como unha homenaxe ao pintor, co que se contextualizaba o seu universo creativo a través dun conxunto de obras de artistas aos que admiraba, cuxo traballo o influira, ou cos que mantivera unha relación persoal. O catálogo inclue a memoria gráfica da exposición, na que están presentes obras de Henri Matisse, Joaquín Torres-García, Pablo Picasso, Fernand Léger, Manuel Ángeles Ortiz, Carlos Maside, Francisco Bores, Maruja Mallo e Óscar Domínguez, acompañada por unha serie de textos a cargo de destacados especialistas.