Coa exposición Sargadelos recuperado, a Fundación Luis Seoane, en colaboración coa Sociedad Estatal de Conmemoraciones Culturales (SECC) celebraba o 40 aniversario da creación do Laboratorio de Formas por Luis Seoane e Isaac Díaz Pardo, unha iniciativa cultural desenvolvida na década dos 60 que aspiraba a recuperar a literatura, a arte e o deseño galegos previos ao estalido da Guerra Civil, e impulsar a modernización definitiva da cultura en Galicia. Partindo da unión dos conceptos de Arte e Industria, e tomando como referencia experiencias como a Bauhaus, o Laboratorio de Formas daría lugar á refundación da fábrica de cerámica de Sargadelos e á creación do Museo de Arte Contemporáneo Carlos Maside, do Instituto Galego de Información, das Ediciós do Castro, do Laboratorio Xeolóxico de Laxe e do Seminario de Sargadelos. O catálogo, ao igual que a exposición, establece un percorrido pola historia do Laboratorio, contextualizándoo desde un punto de vista histórico, cultural e social a través dunha serie de textos que afondan nos aspectos máis importantes do proxecto.