Durante a primavera de 2018, o patio da Fundación Luis Seoane acolleu a instalación Lume e ferro, a produción queimada do escultor Pepe Galán (A Coruña, 1955), unha peza pertencente ao proxecto A volta dunha ausencia co que o artista galego retomaba a súa actividade expositiva tras un tempo de reflexión e formación. Con esta intervención, Galán utilizaba o efecto simbólico do lume como metáfora da preocupación dos artistas visuais pola súa profesionalización e pola súa dignidade como creadores, conceptos expresados a través do emprego de elementos como o fume e o ferro, e pola confluencia de luz natural e artificial nun espazo expositivo dominado pola presenza do granito e do cristal. O catálogo, que conta cun texto de Daniel López Abel, recolle a a memoria gráfica da totalidade do proxecto, que se desenvolveu na Fundación Luis Seoane da Coruña e no Centro Torrente Ballester de Ferrol.