Xunto coa gran exposición retrospectiva comisariada polo deseñador gráfico David Carballal, Moscoso Cosmos. O universo visual de Victor Moscoso forma parte dun proxecto de investigación iniciado fai máis de cinco anos que reivindica o legado do artista galego Victor Moscoso (Vilaboa, Oleiros, 1936), pioneiro da gráfica psicodélica norteamericana e un dos deseñadores máis influíntes do século XX. Con textos de Steven Heller, director artístico do New York Times e do comisario da mostra, o volume percorre a extensa traxectoria de Moscoso, e inclúe os seus traballos máis coñecidos, como a célebre serie de carteis psicodélicos realizada entre os anos 1966 e 67 ou a súa participación na revista Zap Comix xunto a Robert Crumb e Rick Griffin, entre outros.