Correa Corredoira. Os días gravados é a primeira dunha serie de exposicións coas que a Fundación Luis Seoane desexa recuperar e revisar o traballo de destacados creadores galegos do último terzo do século XX. Os motivos para iniciar este novo ciclo expositivo cunha mostra dedicada á obra gráfica do pintor coruñés Xavier Correa Corredoira responden, por un lado, á vontade de reunir o material realizado polo artista entre os anos 1979 e 1999 neste soporte, ata agora disperso, presentándoo ao público a través dun discurso crítico coherente, e por outro, establecer unha conexión co traballo de Luis Seoane, xa que o gravado era unha das súas técnicas favoritas. O catálogo da exposición conta cunha introdución a cargo do escritor e actor Lino Braxe, cun ensaio do director da Fundación Luis Seoane, Alberto González-Alegre e cun pequeno texto do artista.