O catálogo Jorge Cabezas is Back! é o último elo dun proxecto que naceu no ano 2013, e que se transformaría seis anos máis tarde na Fundación Luis Seoane nunha exposición acerca do universo creativo do pintor coruñés. Comisariada por Antón Reixa, a mostra reuniu máis de 50 obras en diferentes soportes que daban conta das referencias autobiográficas, musicais e culturais do artista, nunha montaxe deseñada polo arquitecto Carlos Pita inspirada na última exposición de Pablo Picasso no Palacio dos Papas de Aviñón en 1970.

Deseñada polo estudo galego desescribir, a presente publicación reflicte fielmente o espírito da mostra, que fuxía do concepto dunha retrospectiva ao uso para centrarse na iconografía do traballo do pintor e as súas influencias, grazas ás fotografías de Juan Rodríguez e aos textos de artistas e amigos. Ademais das pezas presentes na exposición, o volume recolle debuxos dun dos cadernos do artista, varios dos seus deseños e inclue ademais un despregable a través do que é posible percorrer o xigantesco mosaico que protagonizou a montaxe da súa exposición na Fundación Luis Seoane entre marzo e xuño de 2019.