El Ogro é o título dunha instalación realizada por Javier Codesal (Sabiñánigo, Huesca, 1958) para a Fundación Luis Seoane no marco do festival Atlantic Pride, unha obra coa que o artista visual e poeta, pioneiro do vídeoarte en España, elabora unha reflexión acerca do desexo, o amor e a sexualidade. Con motivo da celebración desta exposición na Fundación, a Editorial Caniche publica este libro de artista, nunha edición limitada de 200 exemplares a cargo de Carlos Copertone, comisario do proxecto e autor do texto deste volume que reproduce cinco frases -de Marcel Broodthaers, Manuel Olveira, Meret Oppenheim, o profeta Jeremías e o propio Javier Codesal- que expresan unha busca, a necesidade do artista de indagar en cuestións que lle incumben e sacuden.