A través dunha selección de óleos, augadas, xilografías, bosquexos e documentación persoal, incluíndo fotografías realizadas polo artista, Homenaxes a cidades e outros lugares de Luis Seoane amosa a pegada que a paisaxe, especialmente a urbana, deixou na obra do pintor galego nas viaxes que emprendeu a diferentes destinos, fundamentalmente a capitais europeas, a partir dos anos corenta e durante a década dos sesenta. O catálogo recolle, ademais da memoria gráfica da exposición, un conxunto de ensaios acerca da viaxe que Seoane realizou a Venecia, cidade á que lle dedicaría un célebre álbum de xilografías; o seu paso por Londres, Xenebra ou París; a importancia de Bos Aires na súa traxectoria e a súa relación con Galicia.