No verán de 1999 a Fundación Luis Seoane organizou unha exposición de arte pública na que participaron os artistas Antoni Abad, Isabelle Bribosia, Miguel Molina, Óscar Mora e Carlos Tejo, que realizaron unha serie de intervencións específicas en diferentes puntos da cidade da Coruña. O título da mostra, ao igual que o do catálogo, fai referencia ao poemario de Luis Seoane Fardel de eisilado, publicado por Ánxel Casal en Bos Aires en 1952, que o artista ilustrara cunha serie de debuxos dedicados á emigración en Galicia. A presente publicación inclúe textos do comisario da exposición, Nilo Casares, e dos artistas que formaron parte do proxecto. Textos de Antoni Abad, Isabelle Bribosia, Nilo Casares, Miguel Molina, Óscar Mora e Carlos Tejo.