O 13 de maio de 2017, a Fundación Luis Seoane acollía a estrea de Esquema de farsa, adaptación de Lino Braxe dunha sátira de Luis Seoane publicada na revista Galicia Emigrante no ano 1957, a través da que o artista denunciaba o contido dun folleto editado con motivo da celebración do ‘Día del Emigrante Gallego’ o 12 de outubro de 1956 na cidade da Coruña, no que as autoridades locais ofrecían unha versión idílica da emigración en Galicia totalmente alle a unha realidade que o artista galego coñecía de primeira man. Neste CD recóllese a gravación da adaptación radiofónica da obra representada en directo, unha edición para a que se rescataron algunhas das cuñas publicitarias do programa de radio Galicia Emigrante que Seoane dirixía durante o seu exilio na Arxentina.