Publicado con motivo da celebración en 2010 do centenario do nacemento de Luis Seoane, (Bos Aires, 1910-A Coruña, 1979), o Dicionario Seoane concíbese como unha obra na que se sintetiza o universo creativo e o pensamento do pintor galego, un fito editorial que reúne un compendio heteroxéneo de termos artísticos, teóricos e biográficos relacionados coa súa traxectoria, dando forma a unha ferramenta única para achegarse ao artista, á persoa, ás súas influencias e a todos aqueles que lle acompañaron a través dunha viaxe que, aínda hoxe en día, segue a ser punto ineludible de encontro para estudosos e interesados nas formas artísticas da Modernidade en Galicia.