En novembro de 2007, Darío Basso (Caracas, 1966) inauguraba na Fundación Luis Seoane unha instalación composta por 23 jaimas que envolvían o espazo do patio central do edificio, xunto con catro maquetas e un vídeo que amosaban a base do proxecto e o proceso pictórico da peza respectivamente. Baixo o nome de Algoritmi dixit:, Basso pretendía incidir nas correspondencias entre artes, ciencias e culturas de civilizacións dispares e antitéticas (Oriente e Occidente) ao longo da Historia. A presente publicación, pertencente á colección Non Dispoñible, recolle os aspectos máis destacados da proposta do artista galego e inclúe un estudo sobre a súa obra a cargo do crítico de arte David Barro.